Монгол Улсын Шадар сайд Н.Номтойбаяр Астана хотноо зохион байгуулагдаж буй Евразийн эдийн засгийн V чуулга уулзалтад оролцох үеэрээ БНКазУ-ын Хөдөө аж ахуйн сайд, Монгол Улс, БНКазУ-ын Засгийн газар хоорондын комиссын Казахстан талын дарга Айдарбек Сапаровтой албан ёсны уулзалт хийлээ. Уулзалтаар өнгөрсөн дөрөвдүгээр сард Монгол Улсын Ерөнхийлөгч У.Хүрэлсүхийн БНКазУ-д хийсэн төрийн айлчлалын хүрээнд БНКазУ-ын Ерөнхийлөгч Касым-Жомарт Токаевтай харилцаа, хамтын ажиллагааг өргөжүүлэн хөгжүүлэхтэй холбоотой Засгийн газар болон байгууллага хоорондын 18 бичиг баримтад гарын үсэг зурсныг бодит ажил хэрэг болгож, үр дүнд хүрэх асуудлаар санал солилцлоо. Энэ хүрээнд хоёр орны худалдааны эргэлтийн 13 хувийн өсөлтийг нэмэгдүүлэх олон боломжийг бодит ажил хэрэг болгож, хөдөө аж ахуй, тээвэр логистикийн хамтын ажиллагааг өргөжүүлэхээр тохиролцлоо. Тухайлбал, Казахстаны Хөдөө аж ахуйн сайд Айдарбек Сапаров үр тариа, ургамлын тос зэргийг экспортлох боломжтой бөгөөд Монгол Улсын ноос ноолуурын чиглэлийн арвин туршлагыг нэвтрүүлж, энэ чиглэлийн үйлдвэрлэл эрхлэх сонирхолтой байна гэв.
Шадар сайд Н.Номтойбаяр Монгол Улс, БНКазУ-ын Засгийн газар хоорондын комиссыг ахалж буйн хувьд комиссын үйл ажиллагааг идэвхтэй өрнүүлэхэд анхааран ажиллахаа тодотголоо. Шадар сайдын эрхлэх асуудлын хүрээн дэх Эдийн засгийн тусгай бүсээр дамжуулан хөрөнгө оруулагчдыг татах, үйлдвэрлэлийг дэмжих бодлого баримталж байна гэв. Тухайлбал, Эдийн засгийн тусгай бүсэд газрын эрх, татварын хөнгөлөлтөөр малын гаралтай түүхий эдийг боловсруулж, нэмүү өртөг шингэсэн бүтээгдэхүүнийг экспортлох боломж бүрдүүлэхээр ажиллаж буйгаа онцлон тэмдэглэлээ.
Мөн Шадар сайд Н.Номтойбаяр Бүгд Найрамдах Казахстан Улсын Худалдаа, интеграцийн сайд Арман Шаккалиевтай албан ёсны уулзлаа. Уулзалтаар хоёр орны худалдааны эргэлт 50 сая орчим ам.доллар байгаа нь хангалтгүй үзүүлэлт учраас нөөц боломжид тулгуурлан эдийн засгийн хамтын ажиллагаагаа хөгжүүлэхэд идэвхтэй ажиллахаа илэрхийлэв. Түүнчлэн, Чөлөөт бүсийн тухай хуулийг шинэчлэн найруулж, Эдийн засгийн тусгай бүс болгон өөрчлөх асуудлаар санал солилцож, тус бүсэд Казахстаны үйлдвэрлэл, хөрөнгө оруулалтыг дэмжин ажиллана гэлээ. Мөн бүсчилсэн хөгжлийн бодлогын хүрээнд тээвэр логистикийн оновчтой төлөвлөлтийг хийж, Евразийн бүс нутгийн эдийн засгийн интеграцид оролцох боломжийн талаар Шадар сайд Н.Номтойбаяр онцолж байна. БНКазУ-ын Худалдаа, интеграцийн сайд Арман Шаккалиевийн зүгээс Монгол Улстай хөдөө аж ахуй, мал аж ахуй, ашигт малтмал боловсруулалтын чиглэлээр хамтран ажиллах сонирхолтой байгаагаа илэрхийлж, хөрөнгө оруулалт, худалдаа, эдийн засгийн чиглэлээр харилцан санал солилцлоо.
Талууд Монгол Улс, БНКазУ-ын түүх соёл, өв уламжлалын хэлхээ холбоотой, найрсаг уламжлалт харилцаа шат ахиж “Стратегийн түншлэл”-ийн түвшинд хүрсэнд баяртай байгаагаа илэрхийлж, харилцаа, хамтын ажиллагааг бүхий л салбарт өргөжүүлэн хөгжүүлэхэд идэвхтэй ажиллана гэлээ.
Бүгд Найрамдах Казахстан Улсын Астана хотноо зохион байгуулагдаж буй Евразийн эдийн засгийн V чуулга уулзалтад Монгол Улсын Шадар сайд Н.Номтойбаяр (2026.05.28) оролцож, нэгдсэн хуралдаанд үг хэллээ. Энэ удаагийн чуулга уулзалтыг “Дэлхийн цахим өрсөлдөөн дэх Евразийн эдийн засгийн холбоо: Хиймэл оюун ухаанд тэргүүлэх ач холбогдол олгох нь” сэдвийн хүрээнд зохион байгуулж байна. Уулзалтад Бүгд Найрамдах Казахстан Улс, Оросын Холбооны Улс, Бүгд Найрамдах Армени Улс, Бүгд Найрамдах Киргиз Улс, Бүгд Найрамдах Беларусь Улс, Бүгд Найрамдах Куба Улс, Бүгд Найрамдах Социалист Вьетнам Улсын төрийн тэргүүн нар оролцож байна. Манай улс “Монгол Улс, Евразийн эдийн засгийн холбоо, түүний гишүүн орнууд хоорондын чөлөөт худалдааны түр хэлэлцээр”-ийг 2025 оны 6 дугаар сарын 27-ны өдөр Минск хотноо байгуулж, мөн оны 12 дугаар сарын 12-ны өдөр УИХ-ын чуулганы нэгдсэн хуралдаанаар соёрхон баталсан.
Монгол Улсын Шадар сайд Н.Номтойбаяр Бүгд Найрамдах Казахстан Улсын Ерөнхийлөгч Эрхэмсэг ноён Касым-Жомарт Токаев 2026 оныг Цахим шилжилт ба хиймэл оюун ухааны жил болгон зарлаж, энэ үйл явц амжилттай өрнөж байгаад баяр хүргэлээ. Тэрбээр, дэлхий ертөнц хиймэл оюун, их өгөгдөл, дижитал хөгжил хэмээх их өөрчлөлтийн эринд шилжиж байгаа энэ үед Монгол Улсын Засгийн газар хиймэл оюун ухааны үндэсний стратегийг боловсруулан судалгаа, хөгжүүлэлтэд оруулах хөрөнгө оруулалтыг дэмжих зайлшгүй шаардлагатай учраас эдийн засгийг мэдээллийн технологи, хиймэл оюун ухаанд суурилсан бүтэц рүү шилжүүлж, Монгол Улсыг Төв Азийн бүс нутаг дахь дижитал төв болгон хөгжүүлэх зорилтыг Засгийн газраас дэвшүүлж буйг онцоллоо.
Түүнчлэн, Монгол Улс Евразийн эдийн засгийн холбоотой байгуулсан хэлэлцээрээр дамжуулан гадаад худалдааны бүтцийг төрөлжүүлэх, экспортын зах зээлийг тэлэх, олон улсын интеграцид идэвхтэй оролцохыг зорьж байгаагаа илэрхийллээ. Хэлэлцээрийн дүнд ЕАЭЗХ-ны гишүүн орнууд болон Монгол Улсын хооронд он удаан жилийн турш яригдаж ирсэн тарифын болон тарифын бус саад тотгор багасаж, хэтдээ илүү өргөн нэр төрлийн барааг тарифаас чөлөөлөх боломжтой болно гэдэгт итгэлтэй байна хэмээн Монгол Улсын Шадар сайд Н.Номтойбаяр тодотгож байна.